De hoeëge Bliërickse Vastelaovesónderscheiding ‘de Worteletruuj’ wuurt in 2024 toegekind aan Stichting Voedselhulp Blerick. Det haet Vastelaovesgezelschap de Wortelepin  op veurdracht van de jury van de Worteletruuj beslaote.

‘De Worteletruuj’ wuurt idder jaor toegekind aan persoeëne, vereiniginge, stichtinge of instellinge die zich verdeenstelik hebbe gemak op lokaal/regionaal gebied. De oetreiking is óntstaon op initiatief van ’t veurmalig Fonds Sociale Aktiviteite en wuurt hede ten dage veurtgezatte door Vastelaovesgezelschap ‘de Wortelepin’.

Stichting Voedselhulp Blerick, opgerich door Gino en Charlotte Verheijden, kump al sinds 2008 op veur minse in ós gemeinte die door umstandighede rond de ermoodgrens mótte laeve en die in ‘t reguliere hölpcircuit boete d’n boeët valle. Charlotte en Gino weite oet eige ervaring wie ’t is um met weinig geld rónd te mótte kómme, ze krege zelf te make met schöldhölpverlieëning nao ‘n avontuur as zelfstandig óndernemers.

Desondanks bekómmere dees Bliërickenaere zich al jaore veural um andere. Det doon ze ónder mier door laevesmiddelepakkette oet te deile aan gezinne die meujte hebbe um rond te kómme. Maar dao naeve verzörg Charlotte workshops en ónderneemp zeej activiteite met kinder van clieënte en lierlinge van Bliërickse basisschoeële en verzörg’t paar ‘n internetcafé en aope inloup um minse waegwies te make.

Wie zier de inwoeëners van Bliërick en gans Groeët-Venlo Voedselhulp Blerick in de erm hebbe geslaote bleek waal nao ’t onheil det de Stichting in 2023 euverkwaam. Beej de groeëte brand in de Voltastraot in mei van dit jaor ging de ganse veurraod met conserve die lang haldbaar ware van de Stichting in vlamme op. Medelaeve maar veural ouk gifte, inzamelingsakties en minse die aan de deur aeteswaar kwame bringe ware ’t resultaat.

’t Is ‘n vorm van erkinning veur al ’t goje werk det Charlotte, Gino, ’t stichtingbestuur en al eur vreejwilligers al sinds jaor en daag doon. En de jury van de Worteletruuj  alsmede Vastelaovesgezelschap de Wortelepin ónderschrieve die erkinning en zien dan ouk gruuets en verierd de Worteletruuj in 2024 toe te kinne aan Stichting Voedselhulp Blerick.

De ónderscheiding wuurt oetgereik tiedes ‘t 48e Groeët Gala Worteletruuj op dinsdaag 6 fibberwarie. De opbrings van ’t Gala geit nao ’n good doel, det in euverleg met de laureaat wuurt bepaold en op ‘t Gala bekind zal waere gemak.