Vastelaovesgeis

Door de Wortelepin is aan de bekinde Blierickse kunstemaeker Ruud Simons gevraog um eine symbolisch beeldje te ontwerpe as wisseltrofee veur de deilnemers aan de groëte optoch, dae op vastelaoveszondaag door de Bliërickse straote trek. ’t Ontwerp van Ruud is in brons gegaote en zal veurzeen waere van eine rvs-voot.

’t Beeldje verder verklaord:
Oét ’t Blierickse vereinigingslaeve en door creatieve inbring (weergegaeve door ‘nne hamer, zaag en klöske gare op de voot van ‘t beeldje) ontsteit d’r eine vastelaovesgeis, dae symbool steit veur de vastelaovend.
Dae geis trek ‘n akelig gezich nao ’t bevoeg gezag (hae lach se met die dreej daag oét), maar ’t vastelaovesgeveul wuurt weergegaeve door ’t maske achter op ziene rök. Dáe geis mot door de Blierickse vastelaovend trekke.

Dit beeldje (wisseltrofee) zal op vastelaoveszondaag door ’t prinselik trio veur de iërste kiër in de historie van de Wortelepin oëtgereik gaon waere aan dae optochdeilnemer, dae van alle optochdeilnemers de meiste punte van de sjurie krieg (ongeach in welke kategorie). Oëtgeslaote heejvan zien de optochdeilnemers in de kategorie “boëte meidedinging”.